ගලගොඩඅත්තේ හිමි චීවරධාරීයෙක්ද යන සැකය මතුවනවා.... හකීම්ගෙන් පිළිතුරු

බොදු බල සේනා සංවිධානයේ ක්‍රියාකාරිත්වයෙන් රට අගාධයට යන තත්ත්වයක් පෙන්නුම් කරන්නේ යැයි පවසන ශ්‍රී ලංකා මුස්ලිම් කොංග්‍රසයේ නායක ඇමැති රවුෆ් හකීම් මහතා ඉන් රට බේරා ගැනීමට ධෛර්යමත්ව කටයුතු කළ යුතු යැයි අවධාරණය කරයි.

බොදු බල සේනා සංවිධානයේ ලේකම් ගලගොඩඅත්තේ ඥානසාර හිමි ඉකුත් දිනෙක පැවැති මාධ්‍ය සාකච්ඡාවකදී තමන් පිළිබඳව නින්දිත හා පහත් ආකාරයෙන් අදහස් දැක්වූ
බව සිහිපත් කරන රවුෆ් හකීම් මහතා එතරම් පරුෂ ආකාරයෙන් බනිද්දී ඔවුන් චීවරධාරීන්ද යන සැකය මතුවන බවත් පෙන්වා දෙයි.

අවවාද කරන ආකාරයෙන් පහත්, නින්දිත ලෙස යමෙකුට කතා කරන්නේ නම් ඒවාට යටත් විය යුතු නැතැයි පෙන්වා දෙන ඒ මහතා කතා කිරීමේ අයිතිය හැම දෙනාටම හිමිවිය යුතු බවත්, එම අයිතිය සඳහා තමන් හැමවිටම ක්‍රියාකරන බවත් පවසයි. "බුදු දහමේ කරුණාව, මෛත්‍රිය පවතින බව අපි දකිනවා. යහපත් වචන භාවිතය ගැන බුදු දහමේ කියැවෙනවා. ඒත් ගලගොඩඅත්තේ ඥානසාර හිමියන් අනෙකුත් යහපත් වචන කතා කරන සංඝරත්නයටත් අපහාස වන පරිදි ආවේගශීලීව කතා කිරීම ගැන මම කනගාටුවෙනවා. මං සෑම අවස්ථාවකදීම සංඝරත්නයට ගරු කරනවා. එහෙම තිබියදීත් මෙතරම් පහත් ලෙස මා සම්බන්ධයෙන් කතා කිරීම මට ප්‍රහේලිකාවක්. ජනතාවගේ මානසිකත්වය පිළිබඳව කතා කිරීම, ජනවරම තුළින් අපට ලැබුණු අයිතියක්. එහෙම කතා කළා කියලා භික්ෂුන් වහන්සේට ඇති ගෞරවයට එයින් හානියක් වෙන්නේ නැහැ.