සන්ධානයේ ගොන් පොරය තම තමන්ම මරා ගනි

එක්සත් ජනතා නිදහස් සන්ධානය යටතේ දකුණු පළාත් සභාවට හම්බන්තොට දිස්ත්‍රික්කයෙන් තරඟ වදින ඩි. වී. උපුල් මහතාගේ සහ එම්. කේ. කසුන් මහතාගේ ආධාරකරුවන් දෙපිරිසක් අතර බෙලිඅත්ත ප්‍රදේශයේ දී ගැටුමක් හටගෙන තිබේ.

බෙලිඅත්ත, පුවක්දණ්ඩාව මිහිඳුපුර ප්‍රදේශයේදී අද (18) අලුයම හටගත් මෙම ගැටුමෙන් දෙපාර්ශවයේම පුද්ගලයින් පස් දෙනෙකු තුවාල ලබා ඇතැයිද ප්‍රාදේශිය සභා මන්ත්‍රීගේ කැලුම් ප්‍රියංකරගේ නිවසට,
කාර්යාලයට හා උපුල්ගේ කාර්යාලයට අලාභ හානි කැර ඇතැයිද මනාප ගැනීමේ සටන මේ ගැටුමට මුල්වී ඇතියිද පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතීඥ අජිත් රෝහණ මහතා කියා සිටියි.

තුවාල ලුබූවන් ප්‍රතිකාර සඳහා මේ වනවිට බෙලිඅත්ත සහ මාතර රෝහල්වලට ඇතුළත් කර තිබේ.

කසුන් මහතාගේ අධාරකරුවන් පිරිසකට පහරදුන්නේයැයි ලැබුනු පැමිනිල්ලක් මත ඩී.වී උපුල් මහතා පොලීසිය විසින් අත්අඩංගුවට ගෙන තිබේ.

ඔහු අද තංගල්ල මහේස්ත්‍රාත් අධිකරණයට ඉදිරිපත් කිරීමට නියමිත බව සඳහන් වේ.

ඩී. වී. උපුල් මහතා සන්ධානයේ හිටපු අමාත්‍යවරයෙකු වන අතර එම්. කේ. කසුන් මහතා බෙලිඅත්ත ප්‍රාදේශීය සභාවේ සභාපතිවරයාය. ඔහු එම්. කේ. රංජිත් නොහොත් චණ්ඩිමල්ලිගේ වැඩිමහල් පුත්‍රයාය.