වාස්‌ ගුණවර්ධනගේ බවට සැකකරන අවි ගබඩාවක්‌ අල්ලයි

කෝටිපති ව්‍යාපාරිකයකු වූ මොහොමඩ් ෂියාම් නමැත්තා ඝාතනයේ ප්‍රධාන සැකකරුවකු වී සිටින හිටපු නියෝජ්‍ය පොලිස්‌පති වාස්‌ ගුණවර්ධනට අයත් බවට සැකකරන අවි ආයුධ ගබඩාවක්‌ වැලිවේරිය ප්‍රදේශයේ සත්ව ගොවිපළකින් මතුකරගත් විශේෂ පොලිස්‌ කණ්‌ඩායමක්‌ එම ආයුධ අත්අඩංගුවට ගෙන ඇත.

මෙම අවි ගබඩාවේ තිබී ටී. 56 අවි 5 ක්‌, ආර්. පී. ජී. අවි 2 ක්‌, බෝම්බ, පිස්‌තෝල ඇතුළු තවත් ආයුධ රැසක්‌ සොයාගෙන තිබේ.

හිටපු නියෝජ්‍ය පොලිස්‌පති වාස්‌ ගුණවර්ධන මහතාගේ පුද්ගලික සහකාරවරයකු
ලෙස කටයුතු කළ පොලිස්‌ පරීක්‍ෂකවරයකු අත්අඩංගුවට ගෙන ප්‍රශ්න කිරීමේදී මෙම අවි ගබඩාව පිළිබඳව තොරතුරු හෙළිවී ඇත.

මෙම අවි ආයුධ සොයා ගැනීම පිළිබඳව පොලිසිය මගින් අළුත්කඩේ අංක 05 අධිකරණය වෙත කරුණු වාර්තා කර තිබේ.

ස්‌වයංක්‍රීය අවි ආයුධ තොගය කෙසේ ලැබුණේද යන්න පිළිබඳව පොලිසිය පරීක්‍ෂණ පවත්වාගෙන යයි.

මුස්‌ලිම් ජාතික ව්‍යාපාරිකයකු ලබා දුන් මුදල් කොන්ත්‍රාත්තුවක්‌ මත තවත් මුස්‌ලිම් ව්‍යාපාරිකයකු වූ මොහොමඩ් ෂියාම් නමැත්තා පැහැරගෙන ගොස්‌ ඝාතනය කළ බවට හිටපු නියෝජ්‍ය පොලිස්‌පති වාස්‌ ගුණවර්ධන, ඔහුගේ පුත්‍රයා ඇතුළු පොලිස්‌ කණ්‌ඩායමක්‌ වෙත චෝදනා එල්ලවී තිබේ.