එතරම් තරග ප්‍රමාණයක්‌, එතරම් කාලයක පටන් ක්‍රීඩා කළ ඕනෑම ක්‍රීඩකයෙක්‌ නිතැතින්ම ජ්‍යෙෂ්ඨයෙක්‌ වෙනව. ඒත්, මහේල යනු ජ්‍යෙෂ්ඨත්වය මෙන්ම ශ්‍රේෂ්ඨත්වයත් එක ලෙස ළඟා කර ගත් ක්‍රීඩකයෙක්‌. ඒ ශ්‍රේෂ්ඨත්වය ශ්‍රී ලංකාව වෙනුවෙන් ටෙස්‌ට්‌ තරගවලදී වැඩිම ලකුණු ලබාගත් පිතිකරුවාගේ ශ්‍රේෂ්ඨත්වය වෙනව. (සංගක්‌කාර හා සමතැන් ගනී) ඒ ශ්‍රේෂ්ඨත්වය ලොව වැඩිම ටෙස්‌ට්‌ ලකුණු ලාභීන් අතර 7 වැනි ස්‌ථානයේ පවතිනව. එසේම එක්‌ ටෙස්‌ට්‌ ඉනිමක ලොව වැඩිම ලකුණු ලාභීන්ගේ ලැයිස්‌තුවේ 4 වැනි ස්‌ථානයේ පවතිනව. එසේම ටෙස්‌ට්‌ ක්‍රිකට්‌ පිටියේ ඕනෑම කඩුල්ලක්‌ සඳහා ලොව හොඳම සම්බන්ධතාවයේ ප්‍රමුඛ හිමිකරුවාගේ ශ්‍රේෂ්ඨත්වයද ඔහුට හිමි වනව. එසේම ලොව වැඩිම ටෙස්‌ට්‌ උඩ පන්දු රැක ගත් ක්‍රීඩකයන් අතර 3 වැනි ස්‌ථානයද මහේලට හිමි වෙනව. එතැනින්ද නොනැවතී ක්‍රිකට්‌ ක්‍රීඩාවේ ජීව ගුණය රැකගත් ක්‍රීඩකයාගේ සම්මානයෙන් සහ විස්‌ඩන් ක්‍රිකට්‌ ක්‍රීඩකයාගේ සම්මානයෙන්ද මහේල පුද ලැබුවේ ඒ ශ්‍රේෂ්ඨත්වය නිසයි. ජ්‍යෙෂ්ඨත්වයටත් වඩා ශ්‍රේෂ්ඨත්වයක්‌ මේ හෙයින් මහේලට හිමි වෙනව.
මේ ශ්‍රේෂ්ඨයා ටෙස්‌ට්‌ ක්‍රිකට්‌ ක්‍රීඩාවෙන් සමුගැනීමට තීරණය කරලා. ඒ එළඹෙන පකිස්‌තානයත් සමඟ තරගාවලියෙන් පසුව. මේ පුවත ශ්‍රී ලංකාවේ ක්‍රිකට්‌ ක්‍රීඩාවට පෙම් බැඳි හැම දෙනාගේම සිත් වික්‍ෂිප්ත කිරීමට හේතු වුණා. ඒ හැමගේ අදහස වී තිබුණේ මහේලගේ තීරණය ඉක්‌මන් වැඩි බවයි. ඒ බව ඔහුගේ සංඛ්‍යා දත්ත විමසා බැලීමේදීද මැනවින් පෙන්නුම් කරනවා. එක්‌ දින තරගවලදී යම් පසු බෑමක්‌ පසු ගිය කාලයේ මහේලගෙන් දක්‌නට ලැබුණත් ටෙස්‌ට්‌ තරග වලදී මේ වර්ෂයේ ඔහු තරග 6 කදී ලකුණු 682 ක්‌ රැස්‌ කරගෙන තිබෙනවා. එහි සාමාන්‍යය 75.77 ක්‌ වෙනව. ඊට ද්විත්ව ශතකයක්‌, ශතකයක්‌ සහ අර්ධ ශතක 3 ක්‌ ඇතුළත් වෙනව. ටෙස්‌ට්‌ තරග වලදී 2011, 2012 සහ 2013 වසර වලදී පෙන්වන ලද තරමක දුර්වලතාවය මහේල මේ වසරේදී හදා ගෙන ඇති බවත් ඉන් පෙනෙනවා. එසේම මේ වන විට මහේල ටෙස්‌ට්‌ තරග 145 ක්‌ ක්‍රීඩා කර ඇති අතර මෙම දකුණු අප්‍රිකා තරග 2 සහ පකිස්‌තාන තරග දෙක ක්‍රීඩා කළත් මහේල ක්‍රීඩා කරන්නේ ටෙස්‌ට්‌ තරග 149 ක්‌ විතරයි. ඒ නිසා මහේල අඩුම තරමේ ටෙස්‌ට්‌ තරග 150 කඩඉම හෝ සනිටුහන් කර සමුගනු ඇති බවයි, මහේලට ආදරය කරන සියලු ක්‍රිකට්‌ ප්‍රේක්‍ෂකයන්ගේ කැමැත්ත වී තිබෙන්නේ.
කුෂාන් සුබසිංහ
.jpg)
.jpg)
0 comments:
Post a Comment