එම සංවිධානයේ ජාතික සංවිධායක පූජ්‍ය ඉත්තෑකන්දේ සද්ධාතිස්ස හිමියෝ මේ බව පැවසුවේ අද දින එම සංවිධානයේ භික්ෂූන් වහන්සේලා සමග බුද්ධ ශාසන අමාත්‍යංශයට වැඩම කරන ලද අවස්ථාවේදීය.
යළිත් වරක් තමන්වහන්සේ හා තම සංවිධානය රැවටීමට ලක් කළහොත් ඊළඟ වතාවේ බුද්ධ ශාසන අමාත්‍යංශයට නොව අග්‍රාමාත්‍ය කාර්යාලයටම ගොස් ගැටලු විස¼දා ගැනීමට කටයුතු කරන බව රාවණා බළකාය සංවිධානයේ මහ ලේකම් ඉත්තෑකන්දේ සද්ධාතිස්ස හිමියෝ පැවැසූහ.
අන්‍යාගම්කරණයට ගොදුරු කරගන්නා අහිංසක නැඟෙනහිර ජනතාව වෙනුවෙන් අමාත්‍යංශය කිසිදු පියවරක් ගෙන නොමැති බව උන්වහන්සේ අමාත්‍යංශ ලේකම්වරයාගේ මුහුණටම චෝදනා කළහ.
ඒ චෝදනාවට පිළිතුරු දෙමින් "හාමුදුරුවනේ, දන්නෙ නැතිව කරුණු හොයන්නෙ නැතිව කතා කරන්න ලෑස්ති වෙන්න එපා. අපි අන්‍යාගම්කරණය පිළිබඳව රාජතාන්ත්‍රිකව පවා කටයුතු කරගෙන යනවා" යැයි ලේකම්වරයා කළ ප්‍රකාශයත් සමඟ එම සංවාදය තරමක් උණුසුම් ස්වරූපයක් ගත්තේය. රාවණා බළකාය සංවිධානය ඊයේ අමාත්‍යංශ ලේකම්වරයා හමුවීමට අමාත්‍යංශයට ගිය අවස්ථාවේ ලේකම්වරයා මාධ්‍යයට ඇතුළු නොවන ලෙස කළ ඉල්ලීමට විරුද්ධ වූ සද්ධාතිස්ස හිමියෝ එම අවස්ථාව ආවරණය කිරීම සඳහා එම ස්ථානයට මාධ්‍යවේදීන් කැඳවා ගැනීමට කටයුතු කළහ.
මූලධර්මවාදී අන්‍යාගම්කරණය වැළැක්වීම, බෞද්ධ ප්‍රකාශන නියාමන පනත ගෙන ඒම, මහා සංඝරත්නයට අදාළ චක්‍රලේඛ නිකුත් කිරීමේදී මහානායක හිමිවරුන් දැනුම්වත් කිරීම, විහාර දේවාලගම් පනත ගෙන ඒම, බුද්ධ ශාසන ගැටලු විසඳීමට ක්‍රියාශීලී කණ්ඩායමක් පත් කිරීම යන කරුණු පහ මූලික කරගනිමින් ලේකම්වරයා හමුවූ අවස්ථාවේ මෙතෙක් අමාත්‍යංශය මේ එකදු කරුණක් සඳහා අවධානය යොමුකර නොමැති බවට ඒ හිමියෝ චෝදනා කළහ. මේ සඳහා ජනාධිපතිවරයාගේ ඍජු නියෝජිතයෙක් පත් කරන ලෙසද උන්වහන්සේ ඉල්ලා සිටියහ.
මේ කරුණු සාකච්ඡා කිරීම සඳහා ජනාධිපති ලේකම් ලලිත් වීරතුංග මහතා අමාත්‍යංශයට පැමිණෙන තෙක් තමන්වහන්සේ අමාත්‍යංශයෙන් ඉවත් නොවන බව පැවැසූ ඒ හිමියෝ මේ සඳහා සාකච්ඡාවක් ලබාදෙන ලෙසද කීහ. එවිට ලේකම්වරයා ප්‍රකාශ කර සිටියේ වීරතුංග මහතා අමාත්‍යංශයට කැඳවීමට තමාට බලයක් නොමැති බවද කීය.
පසුව අග්‍රාමාත්‍යවරයාගේ පෞද්ගලික ලේකම් අනුරාධ ජයරත්න මහතා දුරකතනයෙන් අමාත්‍යංශ ලේකම්වරයා අමතා සති දෙකක් ඇතුළත අමාත්‍යංශ නියෝජ්‍ය ඇමැති හා අග්‍රාමාත්‍යවරයා සමඟ සාකච්ඡාවක් ලබාදීමට කටයුතු කරන බව සද්ධාතිස්ස හිමියන්ට දන්වා සිටියේය.
එය ලිඛිතව ලබාදෙන ලෙස උන්වහන්සේ කළ ඉල්ලීමේදී බුද්ධ ශාසන අමාත්‍යංශ මාධ්‍ය ලේකම් ජයසූරිය උඩුකුඹුර මහතා හා අමාත්‍යංශ ලේකම්වරයාගේ අස්සනින් යුත් ලිපියකින් සති 2ක් ඇතුළත සාකච්ඡාවක් ලබාදෙන බව දන්වා සිටි පොරොන්දුව මත රාවණා බළකාය සංවිධානයේ හිමිවරු අමාත්‍යංශයෙන් ඉවත් වූහ.
රාවණා බල සංවිධානයේ ඉල්ලීම් ඇතුළත් ලිපියක් ලේකම්වරයාට භාර දීමටද මෙහිදී සද්ධාතිස්ස හිමියෝ කටයුතු කළහ.
.jpg)
.jpg)
0 comments:
Post a Comment