ලන්ඩන් වෙබ් ලොක්කා ගණිකා ජාවාරමක

පවුලේ ඥාතීන් උපයෝගී කරගෙන සිදුකරනු ලබන ගණිකා ජාවාරම සහ වෙනත් නීතිවිරෝධී කටයුතු පිළිබඳ "මව්බිම" පුවත්පත ඔස්සේ රටට කරුණු හෙළිදරව් කිරීමත් සමඟ එංගලන්තයේ ලීඩ්ස් නුවර සිට මඩ වෙබ් අඩවියක් මෙහෙය වන වෙබ් මාෆියාවට සම්බන්ධ පුද්ගලයකු දැඩි ලෙස කලබලයට පත්ව ඇති බව දැන ගන්නට ඇත.


ඒ අනුව මෙම තැනැත්තා සිය මඩ වෙබ් අඩවිය උපයෝගි කරගනිමින් "මව්බිම" පුවත්පතට එරෙහිව අසත්‍ය පුවත් පළ කිරීමේ ව්‍යාපෘතියක් මේ වනවිට ආරම්භ කොට තිබේ. මීට සති කීපයකට ඉහතදී "මව්බිම" පෙන්වා දුන්නේ මෙම පුද්ගලයා මඩ පුවත් සිය වෙබ් අඩවියේ පළ කරමින් මෙරට සිටින ව්‍යාපාරිකයන්ගෙන් හා ප්‍රභූ පුද්ගලයන්ගෙන් කප්පම් මුදල් එකතු කිරීමේ ව්‍යාපාරයක නිරත වී සිටි බවත්, මිනිස් ජාවාරම හරහා ඉතා විශාල ලෙස මුදල් රැස්කර ගත්තකු බවත්ය. ඒ සම්බන්ධයෙන් ලැබුණු පැමිණිලි මත ආරක්ෂක අංශ මෙම පුද්ගලයාට එරෙහිව පරීක්ෂණ ආරම්භ කිරීමත් සමඟ හෙතෙම ලංකාවෙන් පලාගොස් එංගලන්තයේ ලීඩ්ස් නුවර සැඟවී සිටින බවට ආරක්ෂක අංශ වෙත තොරතුරු ලැබී තිබුණු බවද ඒ අවස්ථාවේ "මව්බිම" හෙළිදරව් කර සිටියේය. කෙසේ වෙතත් මේ වනවිට මෙම තැනැත්තාගේ නම ජාත්‍යන්තර පොලිසියටද ඉන්ටර්පෝල් ලබාදී තිබීම නිසා ජාත්‍යන්තර පොලිසියද මෙම තැනැත්තා පිළිබඳ පරීක්ෂණ පවත්වමින් සිටින බව වාර්තා වේ.


මේ අතර අපගේ හෙළිදරව්වත් සමඟ මෙම තැනැත්තා සම්බන්ධයෙන් හා ගණිකා ව්‍යාපාරයට සම්බන්ධ මෙම තැනැත්තාගේ පවුලේ ඥාතීන් සම්බන්ධයෙන් නම් ගම් සහිත සියලු තොරතුරු අප වෙත ලැබී තිබුණද සදාචාරාත්මක හේතු මත ඒවා හෙළිදරව් නොකිරීමට අප තීරණය කර ඇත. එහෙත් අවශ්‍ය වූ මොහොතක එම තොරතුරුද, මංගල දැන්වීම් හරහා මෙම පුද්ගලයා සිදුකර ඇති තවත් දැවැන්ත වංචාවක තොරතුරුද රටට හෙළිදරව් කිරීමට අප ඕනෑම මොහොතක සූදානම්ය.