වික්ටෝරියා දූෂණය කළෙත් නෑ. කුරාම් ඝාතනයට මගේ වගකීමකුත් නෑ.--- තංගල්ල හිටපු සභාපතිත් කියයි

බ්‍රිතාන්‍ය ජාතික කුරාම් ෂයික් ඝාතන නඩුවට අදාලව විත්තිකරුවන් ගේ ප්‍රකාශ සටහන් කර ගැනීම අවසන් වී තිබේ.

කොළඹ මහාධිකරණ විනිසුරු රෝහිනී වල්ගම ඉදිරියේ පැවති මෙම නඩු විභාගයේ දී විත්තිකරුවන්ගෙන් ප්‍රකාශ ලබා ගැනීම සිදු විය.

ප්‍රධාන විත්තිකරු තංගල්ල ප්‍රාදේශීය සභාවේ හිටපු සභාපති සම්පත් චන්ද්‍ර පුෂ්ප විදානපතිරණ අධිකරණය හමුවේ කියා සිටියේ තමන් මෙම චෝදනා ප්‍රතික්ෂේප කරන බවයි.

‘මේ සිද්ධියට මගේ කිසිම සම්බන්ධයක් නැහැ. මගේ දේශපාලන ගමන අඩාල කිරීම සඳහා මාව උවමනාවෙන් මේ නඩුවට පටලවා තිබෙන බව කිව යුතුයි. මට එරෙහිව ඉදිරිපත් වූ සාක්කි පවා අසත්‍ය ලෙස ගොතා තිබෙනවා.’ යනුවෙන් ප්‍රකාශ කළ විත්තිකාර සම්පත් විදානපතිරණ අදාළ චෝදනාවලින් තමන් නිදහස් කරන ලෙසයි අධිකරණයෙන් ඉල්ලා සිටියේ.

'ගොතපු නඩුවක්'
සෙසු විත්තිකරුවන් පස් දෙනාත් අධිකරණය හමුවේ කියා සිටියේ තමන් මෙම චෝදනා ප්‍රතික්ෂේප කරන බවයි.

ප්‍රකාශ සටහන් කර ගැනීම අවසන් කල අධිකරණය, පැමිණිල්ල මෙහෙයවන රජයේ නීතිඥයාගේ දේශනය හෙට, අගහරුවාදා ඉදිරිපත් කරන මෙන් නියම කළේය.

විත්තියේ දේශන සටහන් කර ගැනීමෙන් අනතුරුව නඩු තීන්දුව ප්‍රකාශයට පත් කරන දිනය විනිසුරුවරිය විසින් දැනුම් දෙනු ලැබීමට නියමිතයි.

සාදයේ අපරාධය
දෙදහස් එකොළහ වසරේ දෙසැම්බර් විසිහතර වන දින තංගල්ල ප්‍රදේශයේ නිවාඩු නිකේතනයක පැවති නත්තල් සාදයක දී බ්‍රිතාන්‍ය ජාතික කුරාම් ෂයික් මරා දමා, ඔහුගේ රුසියානු ජාතික පෙම්වතිය වික්ටෝරියා අලෙක්සන්ද්‍රවුනා කාචේවා දුෂණය කළ බවට චෝදනා කරමින් විත්තිකරුවන් හය දෙනාට එරෙහිව නීතිපතිවරයා විසින් මෙම නඩුව පවරනු ලැබීය.

ප්‍රධාන විත්තිකරු තංගල්ල ප්‍රාදේශීය සභාවේ හිටපු සභාපති සම්පත් චන්ද්‍ර පුෂ්ප විදානපතිරණ නඩුව අවසන් වන තෙක් රිමාන්ඩ් භාරයට පත් කර ඇති අතර සෙසු විත්තිකරුවන් ඇප මත මුදා හැරීමට අධිකරණය නියෝග කර තිබේ.
වික්ටෝරියා දූෂණය කළෙත් නෑ. කුරාම් ඝාතනයට මගේ වගකීමකුත් නෑ.
තමාගේ චරිතය හා දේශපාලන ජීවිතයට හානි කිරීම සඳහා තම දේශපාලන හතුරන් තමා කුරාම් ෂේක් මිනී මැරුමට සම්බන්ධ කර ඇතැයි ද, තංගල්ල ප්‍රාදේශීය සභාවේ හිටපු සභාපති සම්පත් චන්ද්‍රපුෂ්ප විදානපතිරණ විත්ති කූඩුවේ සිට ප්‍රකාශයක් කරමින් කොළඹ මහාධිකරණ විනිසුරු රෝහිණී වල්ගම මහත්මිය ඉදිරියේ ප්‍රකාශ කළේය.
හිටපු සභාපති මෙසේ ද කීවේය.
මා දේශපාලනයට ආවේ වයස 24දි. කුරාම් ෂෙයික් සමග හෝ ඔහුගේ පෙම්වතිය සමඟ මගේ තරහක් නෑ. එදා ඔවුන් සමඟ ගැටුමක් ඇති වුණෙත් නෑ. වික්ටෝරියා දූෂණය කළෙත් නෑ. කුරාම් ඝාතනයට මගේ වගකීමකුත් නෑ.
පළමු වැනි සැකකාර ලහිරු කැලුම් ද විත්තු කූඩුවේ සිට ප්‍රකාශයක් කළේය.
එදා - 2011.12.24 වැනි දා- මා හෝටලයට ගියේ නත්තල් සාදයේ නටන්නයි. 150ක් පමණ එහි සිටියා. විදේශිකයනුත් හිටියා. ශාලාවේ හරියට එළිය තිබුණේ නෑ. රෑ 12ට පමණ රතිඤ්ඤා පත්තු වුණා. ගෝරියක් ගෝරියක් යනුවෙන් කවුද කෑ ගැහුවා. මා කිසිවකුටත් ගැහුවේ නෑ. කුරාම්ටවත් ඔහුගේ පෙම්වතියටවත් ගැහුවේ නෑ. අනිත් අය සමඟ මාත් දිව්වා. පසුව මා පොලිසියට ගියා. පසුවදා පියාත් නීතීඥයකුත් මා සමඟ ආවා. එදා රෑ පොලිසියෙන් මා රහස් පොලිසියේ ජගත් රෝහණට භාර දුන්නා.
ඔහු මගේ අත් පා බැන්දා. ඇසුත් බැන්දා. කොහේදෝ රැගෙන ගියා. පහර දුන්නා. පසුදා හෝටලයට ගෙනාවා. මූ තමයි මිනිහා කියා පොලිසිය එහිදී කිව්වා. පසුව උසාවියෙදි මා රිමාන්ඩ් කළා.
දෙවැනි සැකකාර සමන් දේශප්‍රිය මෙසේ කීවේය.
‘මම දෙදරු පියෙක්. හෝටලයට එදා ගියේ මුල් වතාවටයි. මටත් පොල්ලකින් කවුදෝ ගැහුවා. යකෝ මොනවන බලන්නේ කියා කවුදෝ මගෙන් ඇහුවා. කුරාම් මරා දමා ඇති බව දැනගත්තේ පහුවැනි දා.
සිව්වැනි සැකකාර ප්‍රදීප් චතුරංග සිය ප්‍රකාශයෙන් මෙසේ කීවේය.
‘කුරාම්ගේ පෙම්වතිය මම දූෂණය කළේ නැහැ. එතන රණ්ඩුවක් ඇති වුණු බව දැක්කා. බෝතල්වලින් ගහ ගත්තා. බෝතල් බිඳී තිබුණා.
පස් වැනි සැකකාර සරත් සහන් මෙසේ කීවේය.
‘මට උපාධියක් තිබෙනවා. දහම් පාසලෙත් උගන්වා තිබෙනවා. මම මානව සම්පත් කලමනාකරුවෙක්.‘
 ප්‍රගීත් චතුරංග නම් සැකකරු ද විත්ති කූඩුවේ සිට පැවසුවේ තමා මේ අපරාධයට හවුල් නොවූ බවයි.
අඟහරුවාදා (08) පැමිණිල්ලේ දේශන ඇරැඹීමට නියමිතය.