ඉතාලියේ හොල්මන් මැදුරක් ගැන තතු දැන ගතිමි

හොල්මන් අවතාර හා අද්භූත දෑ පිළිබඳ සෙවීමට හා ඒ පිළිබඳව කතා කිරීමට ජාතියක් හෝ වර්ණයක් නොමැතිව ලොව පුරා මිනිසුන් දක්වන්නේ ඉතා දැඩි ආශාවකි. සත්‍යයක් හෝ මිථ්‍යාවක් වුවද ත්‍රාසයට මුසුවූ අමුතුම රසයක් අද්භූත සිදුවීම් තුළින් මිනිසුන් ලබන්නේ පුදුමාකාර ලෙසිනි. ලංකාවේ මෙන්ම ඉතාලිය ඇතුළු යුරෝපීය රටවලද මිනිස්සු අද්භූත සිදුවීම්
පිළිබඳව උනන්දුවක් දක්වති. ඇතැමුන් ඒවා තදින් විශ්වාස කිරීමට පවා පෙළඹී ඇත.
හොල්මන් හා අවතාර අඩංගු චිත්‍රපට නරඹා ඒ පිළිබඳව අවධානයෙන් සිටින්නවුන් සැබෑ ජීවිතයේදීත් එවැනි අත්දැකීම් ලබන්නට විශේෂ කැමැත්තක් දක්වති. සමහරුන්ට සැබෑ ජීවිතයේදී එවැනි බලපෑම් නිසා බොහෝ කරදරවලට පවා මුහුණ දෙන්නට සිදු වන බව අප දැන උන්නේ මව්බිමේදී පමණය. එහෙත් යුරෝපා රටවලද එවැනි අද්භූත සිදුවීම් සිදුවෙන බැව් ඉතාලියට පැමිණියාට පසුව දැනගන්නට ලැබුණාට එවැනි අත්දැකිමක් විඳි කෙනෙකුත් කිසිදාක මුණගැසි තිබුණේම නැත.
හිතවත් ඉතාලි ජාතිකයකු මාර්ගයෙන් හඳුනා ගන්නට ලැබුණු ස්ටෙලා අපගෙන් උදව්වක් ඉල්ලා සිටියේ අප ආසියාතිකයන් වූ නිසාමය. ඇය ලාංකිකයකු හෝ ඉන්දියන් ජාතිකයකු සොයා ගන්නට ඇගේ හිතවතකුගේ උදව් උපකාර පතා ඇත්තේ ඇය සතු විශාල නිවසක ඇතිවූ ප්‍රශ්නයක් නිසාය. ආසියාතිකයන් අමනුෂ්‍යයන් හා සම්බන්ධ ගුප්ත බලවේග සමගින් සමීප සම්බන්ධයක් පවත්වන බැව් ඇය දැනගත්තේ ‍පොත් හා අන්තර්ජාලය මගින් බැව් ඇය අප සමග හමුවූ මුල් දිනයේම පවසා සිටියාය. මේ පිළිබඳව අප දන්නා දේ නොමැති නිසාවෙන් ඇය වෙනුවෙන් කිසියම් උදව්වක් කරන්නට නොහැකි වුවද අද්භූත රසයෙන් පිරුණු ඇගේ නිවස පිළිබඳ කතාව නම් අප සිතේ තදින් සටහන් වූයේ වැඩි වෙහෙසකින් තොරවමය.
ස්ටෙලා උප්පත්තියෙන්ම ඉතා ධනවත් කාන්තාවකි. ඇය සතුව ඉතා විශාල ගෙවල් දොරවල් වතුපිටිද විශාල ප්‍රමාණයක් ඇත. ඇය මේ නිවෙස් කුලියට දීමෙන් අතිරේක ආදායමක් උපයා ගන්නා අතර විකිණීමට ඇති පැරණි විශාල නිවෙස් මිලදී ගෙන ඒවා අලුත්වැඩියා කර ආපසු විකුණා දැමීම හෝ කුලියට දීමද ව්‍යාපාරයක් වශයෙන් කරගෙන යයි. මිලානෝ නගරයේ ඈත කෙළවරකට වන්නට ඇය විසින් මීට වසර ගණනාවකට පෙර නිවසක් මිලදී ගෙන ඇත. ඉතා සුවිසල් මන්දිරයක් වන මෙය මීට පෙර අයිතිව ඇත්තේ මහලු මහත්මයකුට බැව් ඇය පැවසීය. එම මහත්මයා එය මිලදී ගෙන ඇත්තේ ඉතා පැරණි සිටු පවුලකිනි. එම මහත්මයා මියයාමෙන් පසුව ඔහුගේ මුණුපුරා විසින් ස්ටෙලා වෙත විකුණා දමා ඇති මේ නිවස ඉතා අඩු මිලකට මිලදීගෙන අලුත්වැඩියා කර ඇත්තේ නැවත කිසිවෙකුට විකුණා දැමීමට හෝ කුලියට දීමටය.
එහෙත්, නිවස අලුත්වැඩියා කර වසර දහයක් ගතවුණද ස්ටෙලාට මෙම නිවස විකිණීමට තබා මාස කීපයක් එකදිගට කිසිවකුට කුලියට දීමට පවා නොහැකි වූයේ ඇයිදැයි මුලදී ඇයට විශාල ගැටලුවක් වුවද පසුව සොයා බලද්දී මෙම නිවසේ ඇති යම් විශේෂත්වයක් ඇයට අවබෝධ වී
ඇත. මෙම නිවස අලුත්වැඩියාවෙන් පසු මුලින්ම කුලියට ගත් පවුල සතියකින් පසුව ඇයට මුණගැසී පවසා ඇත්තේ මෙම නිවසේ තවත් එක රැයක්වත් රැඳීමට නොහැකි බවකි. එයට හේතුව ලෙසින් ඔවුන් දක්වා ඇත්තේ රාත්‍රී කාලයේ නිවස තුළ  නොයෙකුත් අද්භූත සිදුවීම් සිදුවෙන බවයි.
නිවැසියන් නිදා සිටියදී නිවසේ විදුලි බුබුළු දැල්වෙන අතර රූපවාහිනී යන්ත්‍රය කෙතරම් ක්‍රියාවිරහිත කළද නැවත නැවත ක්‍රියාත්මක වීම ඔවුන්ට මුලදී අත්විඳින්නට ලැබි ඇති අතර පසුව එය නොයෙකුත් අමිහිරි ශබ්ද දක්වාම දුරයාම නිසා ඔවුන් නිවස හැර යන්නට තීරණය කර ඇත.
මුලදී ස්ටෙලා මේ පිළිබඳව වැඩි සැලකිල්ලක් නොදැක්වූවද දෙවන වතාවට පැමිණි පවුලද මේ නිවසේ වැඩි දිනක් රැඳෙන්නට අකමැත්ත පළ කළ අතර ඔවුන්ද කලින් අය සඳහන් කළ හේතුම ගෙනහැර පෑවිට ස්ටෙලා දෙලොවක් අතර අතරමං වී ඇත. ඒ ඇයටද මේ පිළිබඳව කිසිවක් සිතාගත නොහැකි වූ නිසාය. ඉන්පසුව මේ නිවසේ කලින් සිටි අයගේ තොරතුරු සොයන්නට ඇය පෙළඹී ඇත්තේ සිතේ උපන් කුතුහලයෙනි.
ඇයට දැනගන්නට ලැබුණු තොරතුරු අනුව මෙම නිවස වසර ගණනකට පෙර අයිතිය ඇති සිටු පවුලෙන් මෙය මිලදී ගත් අය කිසි දිනක එම නිවසේ පදිංචිව සිට නැත. “ඒ ගෙදර ගොඩක් කල් ඉඳන් වහලා තිබ්බ එකක්. මම ඒක දැනගෙන හිටියත් මේ තරම් ප්‍රශ්න තිබ්බ තැනක් කියලා දැනගෙන හිටියේ නෑ” ඇය පැවැසුවේ දැඩි පසුතැවීමෙනි. ඇය පවසන ආකාරයට සිටු පවු‍ලේ අවසාන පුරුක වූ තරුණ සිටුවරයකු ඔහුගේ ජර්මන් ජාතික බිරිඳ ඝාතනය කර ඇති අතර ඇයගේ මළ සිරුර නිවස තුළම කිසිවෙකුට හසු නොවන සේ සඟවා ඔහු දින කිහිපයකට පසු සියදිවි නසාගෙන ඇත.
නිවසේ සේවකයන් විසින් ‍පොලීසියට දැන්වූ පසු ‍පොලීසිය විසින් ඔහුගේ මළ සිරුර සොයා ගත්තද බොහෝ දවසක් යනතුරු බිරිඳගේ මළ සිරුර සොයා ගන්නට ඔවුනට හැකිවී නැත. අවසානයේ නිවසේ මුද්‍රා තබන ලද අල්මාරියක් තුළ තිබි බොහෝ නරක්වී විනාශ වුණු ඇගේ මළ සිරුර නිවසේ සේවකයන්ට හමුවී ඇත්තේ දින කිහිපයකට පසුවය. ඉන් පසුව ටිකෙන් ටික පාළුවට ගිය එම නිවසේ අවසාන අයිතිකරු විසින් එය වෙනත් කෙනෙකුට විකුණා දමා ඇත.
“මැරිච්ච ජෝඩුව ඒ ගෙදර වත්තේ එක එක තැන්වල ඉන්නවා දැකපු කීපදෙනෙක්ම ඒ පළාතේ ඉන්නවලු. සමහර දාට ගෙදර බැල්කනි එකේ මේ දෙන්න වාඩිවෙලා ඉන්නවා දැකපු අයත් ඉන්නවලු. ඒ වගේම දෙන්නත් එක්ක සමහර දාට සා‍ලේ බාල් නැටුම් තිබුණ කොටසේ නටනවා දැකපු අයත් ඉන්නවා කියලා මට පවුලට සම්බන්ධ කෙනෙක්ගෙන් දැනගන්න ලැබුණා.”
බොහෝ අවස්ථාවලදී නිවසේ හේතුවක් නැතිව නාන කාමරවලින් වතුර කරාම ඇරී කිසිවෙකු ජලස්නානාය කරන ශබ්ද මෙන්ම මුලුතැන්ගෙයි ආහාරපාන ගන්නා ශබ්ද පවා මේ නිවසේ තැන් තැන්වලින් ඇසෙද්දී කිසිවෙකු මෙහි රැඳී සිටින්නට කැමැත්තක් දක්වන්නේ නැත. එහෙත් පුදුමයට කරුණ  වන්නේ ස්ටෙලා මේ නිවසේ රැඳී සිටින්නට කිසිදු බියක් නොදැක්වීමය.
“මම හිටපු දවස්වලටත් එක එක දේවල් සිද්ධ වෙනවා. ගෑනු කෙනෙක් හයියෙන් අඬනවා ඇහෙනවා. සමහර දවස්වලට පඩිපෙළ දිගටම ‍ලේ පැල්ලම් වැටිලා තියෙනවා.
පඩිපේළියේ කීපදෙනෙක් දුවනවා ඇහෙනවා. ඒත් මම බය වෙන්නේ නෑ. ඒ මගේ හැටි” ස්ටෙලා සිනාසෙමින් කියයි.
කෙසේ වුවද ඇයට අපේ උදව්ව අවශ්‍ය වූයේ මේ නිවසේ තිබෙන බව අන් අය විසින් පවසන අද්භූත බලවේග නිසාවෙන් ඇය දැඩි අපහසුවකට පත්ව සිටින නිසාය. එහෙත්, මේ නිවසේ පවතින බව හා අන් අය විසින් පවසන අද්භූත ශක්තින් හෝ පුද්ගලයන් පලවා හරින්නට යුරෝපයේ සිටින කිසිවෙකුට නම් හැකිවන්නේ නැත. ස්ටෙලා පවසන පරිදි මෙසේ කාලයක් යද්දී මෙම නිවස පාළුවට ගොස් තවත් මේ සිද්ධීන් වැඩිවනවා මිස අඩුවක් නොවනු ඇත.
මෙම අද්භූත සිදුවීම්වල ඇත්ත නැත්ත කෙසේ වුවද අප රටේ මෙන්ම හොල්මන් අවතාර යුරෝපය පුරාම ඉතා අනාදිමත් කාලයක පටන් තිබෙන බැව් ඔවුන්ගේ කතාවලින් පිළිගැනීමට නම් සිදුවේ.

ලක්මිණි වෙදමුල්ල ඉතාලියේ මිලානෝ සිට