දේවිකා බ්‍රයන් බලා සිටියදීම වෙනත් පුද්ගලයෙකු සමග හැසිරෙන්න පටන් ගත්තාය (උසාවියෙන් මෙසේ ඇසේ)

එංගලන්තයේ මාධ්‍යවේදියෙකු වන ඔහු බ්‍රයන් ස්මිත්ය. ලක්බිමට පය තිබ්බේ සංචාරකයෙක් විලසිනි. ඔහු නුවරඑළියේද සංචාරය කළේය. සංචාරක හෝටලයක උණුසුම් තේ කෝප්පයකින් ඔහු උණුසුම් වූයේය. හෝටලයේ පිළිගැනීමේ නිලධාරිනිය මොන තරම් ලස්සනද? සංවේදීද අහිංසකදැයි ඔහු සිතුවේය. ඇය දේවිකාය.
අවසානයේ ඔව්හු යළි ඈත් නොවන සුපෙම්වත්තු වූහ. බ්‍රයන් එංගලන්තය බලා පිටත් වෙන්නට දේවිකාගෙන් සමුගත් මොහොත අතිශයින්ම
හැඟීම්බරය.
ඉක්බිති ඔවුන් සම්බන්ධ වූයේ දුරකථනයෙන්ය. ඊට අමතරව ආදරය තැවරුණු දිගු ආදර හසුන්ද ලිව්වෝය.
බ්‍රයන් පුරා වසරකට පසු යළි ලක්බිමට ආවේය. දේවිකා තම නීත්‍යනුකූල දේවිය කර ගැනීමේ ලොකු අභිලාෂයක් ආශාවක් ඔහුට තිබුණේය. දේවිකා ඒ වන විට සිටියේද බ්‍රයන් නීත්‍යනුකූල සැමියා කර ගැනීමේ අපේක්ෂාවෙන්ය.
දේවිකාගේ මවුපියන්ගෙන් ආශීර්වාදය මැද්දේ ඇය බ්‍රයන්ගේ නීත්‍යනුකූල බිරිඳ වූවාය. ලංකාවේ ටික කලක් විසූ බ්‍රයන් දේවිකා එංගලන්තයේ පදිංචියට ගියෝය. රටවල් කිහිපයකට දේවිකා කැටුව ගිය බ්‍රයන් ඇය හැකි තරම් සතුටු කළේය. “දූරං ගමං ඒකචරං අසරීරං ගුහාසයං යනුවෙන් සිත ගැන ගෞතම බුදුරජාණන් වහන්සේ විවරණය කර ඇත.
උන්වහන්සේ වදාරණ පරිදි සිතට ශරීරයක් නැත. ඒ සිතින් සිතපු දේවිකා එංගලන්තයේ සිටියා දැන් ඇති යැයි සිතුවාය. අපි ආයෙත් කුරුණෑගලට යමු. ඇය ඔහුට වද කළා. එංගලන්තය අතහැර ආයෙත් ලංකාවට එන්නට බ්‍රයන් අකමැති විය. එහෙත් ඔහුට බේරෙන්න බැරි විය.
අවසානයේ බ්‍රයන් කුරුණෑගල පදිංචි විය. ලංකාවේ පුරවැසි භාවයද ලබා ගත්තේය. ඔහු දේවිකාගේ නමින් මිලියන හයක් පමණ වටිනා දේපළ ලංකාවෙන් මිලට ගත්තේය.
කාලය විටෙක හරිම සැහැසිය. දේවිකා කමෛන් කමෛන් වෙනස්වන්න පටන් ගත්තාය. ශීතල නුවරඑළියේ ඉපිද එංගලන්තයේ ‍පෝෂිත ආදරය කුරුණෑගලදී පණ අදින්න පටන් ගත්තේය.
දේවිකා බ්‍රයන් බලා සිටියදීම වෙනත් පුද්ගලයෙකු සමග හැසිරෙන්න පටන් ගත්තේය. බ්‍රයන් හරිම සංවේදී අහිංසක මනුස්සයෙකි. පිරිමිකම අමතක කර බ්‍රයන් පුංචි දරුවෙක් මෙන් හැඬුවේය. තමාට පිටු නොපාන ලෙසත් අනියම් සැමියා අමතක කරන ලෙසත් බ්‍රයන් ආයාචනය කළේය. එහෙත් දේවිකා බ්‍රයන් ශත පහක් තරම්වත් ගණන් ගත්තේ නැත.
එංගලන්තයට යන්නට බ්‍රයන්ට දැන් සල්ලිත් නැත. දේවිකා මිලියන පතිනියක කළෙත් මේ බ්‍රයන්ය. බ්‍රයන් මට හමුවූයේ කුරුණෑගල ‍පොලිසියේදීය. ඔහු එදා වගේම අදත් දේවිකාට ආදරේය. බ්‍රයන් ‍පොලීසියට ආවේ දේවිකාට විරුද්ධව පැමිණිලි කරන්න නොවේ. ඇගෙන් දික්කසාද වෙන්නට නඩුවක් ගොනු කරගන්නට අවශ්‍ය කටයුතු කරගන්නටය.
‍ (උසාවියෙන් මෙසේ ඇසේ)