එංගලන්තයේ අවසන් කඩුල්ල දවාගන්න කළ හැකි සෑම උපක්‍රමයක්‌ කළත් අවසන් මොහොතේ හරි කඩුල්ල දවා ගැනීමට හැකිවීම ලොකු දෙයක්‌ බව ශ්‍රී ලංකා ක්‍රිකට්‌ නායක ඇන්ජලෝ මැතිව්ස්‌ ඊයේ (26 දා) ශ්‍රී ලංකා ක්‍රිකට්‌ ආයතනයේ පැවැති මාධ්‍ය හමුවකදී පැවසීය. පසුගිය කාලයේදී කණ්‌ඩායමක්‌ විදිහට නොයෙකුත් ප්‍රශ්න පැමිණියද ක්‍රීඩාංගණයට ගිය විට සියලු ප්‍රශ්න අමතකර කර දමා ජයග්‍රහණය වෙනුවෙන්ම සටන් කරන බවද මැතිව්ස්‌ පවසයි. ඕනෑම කණ්‌ඩායමකට ප්‍රශ්න ඒම සාමාන්‍ය දෙයක්‌ බව පැවසූ මැතිව්ස්‌ වැඩිදුරටත් අදහස්‌ දක්‌වමින් කියා සිටියේ එංගලන්තයේදී තමා ඇතුළු කණ්‌ඩායමට ආ අභියෝග ජයගත් ආකාරයයි. "එක එක රටවල ක්‍රීඩා කරද්දී විවිධ ප්‍රශ්න එනවා. එංගලන්තයේදිත් අපිට හුඟක්‌ ප්‍රශ්න තිබුණා. ඒ ප්‍රශ්න ජය ගන්න අපි කණ්‌ඩායමක්‌ විදිහට හොඳින් ශක්‌තිමත් වුණා. ප්‍රශ්න එන්න එන්න අපිs තවත් දිරිමත් වුණා මිසක්‌ එයින් මානසිකව පොඩ්ඩක්‌වත් වැටුණෙ නැහැ. අපි එක පවුලක්‌ වගේ තමයි ක්‍රීඩා කරන්නෙ."
තම කණ්‌ඩායම කිසිවිටෙකත් ආවේගශීලි කණ්‌ඩායමක්‌ නොවන බවත් එහෙත් කවුරු හරි දෙයක්‌ කළොත් ඒ දෙයට නොපැකිළිව ප්‍රතිප්‍රහාර දෙන බවත් මැතිව්ස්‌ පවසා සිටියේ ජෝ රූට්‌ සමග ඇති කරගත් වාචික ප්‍රහාරයන් පිළිබඳව මාධ්‍යවේදීන්ට පිළිතුරු දෙමිනි.
"අපි බොහොම තැන්පත් කණ්‌ඩායමක්‌. කිසිවිටෙකත් ක්‍රීඩාංගණයේදී කලහකාරි ලෙස හැසිරෙන්නෙ නැහැ. ඒත් කවුරු හරි අපිට දෙයක්‌ දුන්නොත් ඒ දේට පැකිළීමකින් තොරව ප්‍රතිඋත්තරය දෙනවා. එංගලන්තය සමග තරග කරද්දි ජෝ රූට්‌ අපිට නිතරම එක එක දේවල් කිව්වා. ඒ දේවල් වලට අපිත් ප්‍රතිප්‍රහාරය දුන්නා."
එංගලන්තයේ ශීතල සහ ආසියාවෙන් එපිට තරග කරද්දී ඇතිවන මානසික සහ කායික ප්‍රශ්නයට ශ්‍රී ලංකාව හුරුවූ අයුරු පැවසූ මැතිව්ස්‌,
"අපි හුඟක්‌ ආසියාවේ ක්‍රීඩා කරල තමයි එංගලන්තයට ගියේ. එහෙදි අපිට තණතීරුවලට හුරු වෙන එක ලෙහෙසි වුණේ නැහැ. ඒ බව දැනගෙන අපි ලංකාවෙදි උදේ පාන්දර පුහුණුවීම් කරල ලැහැස්‌ති පිට තමයි එංගලන්තයට ගියේ. අපේ පුහුණුකරුවන් වගේම තේරීම් කමිටුවත් මේ ජයග්‍රහණය විශාල දායකත්වය ලබාදුන්නා." යනුවෙන් මැතිව්ස්‌ වැඩිදුරටත් පැවසීය.
පැවැති මාධ්‍ය හමුව සඳහා පැමිණ සිටි ශ්‍රී ලංකා විස්‌සයි විස්‌ස නායක ලසිත් මාලිංග පවසා සිටියේ ටෙස්‌ට්‌ තරග කිරීමට නොහැකි වීම ගැන කිසි විටකත් කණගාටු නොවන බවත් ඒ සඳහා හොඳ ක්‍රීඩකයන් සිටින බවත්ය.
"මම ටෙස්‌ට්‌ තරග 30 ක්‌ ක්‍රීඩා කරල තියෙනවා. මම හිතන්නෙ මට වැඩිය හොඳ නවකයන් දැන් ක්‍රීඩා කරනවා. ඒ නිසා ටෙස්‌ට්‌ ක්‍රීඩා කිරීමට නොහැකිවීම පිළිබඳව කණගාටුවක්‌ නැහැ." යනුවෙනි.
ශ්‍රී ලංකා ප්‍රධාන පුහුණුකරු මාවන් අතපත්තු සිය පුහුණුකරුවන් සියලු දෙනාම මේ ජයග්‍රහණයට දායක වූ බවත් මැතිව්ස්‌ගේ නායකත්වය ඉතා වටිනා බවත් පැවසීය. "මැතිව්ස්‌ වගේ නායකයකු යටතේ පුහුණුකරන්න ලැබීම ඇත්තටම මට මෙන්ම අනිත් පුහුණුකරුවන්ටත් ලොකු වාසනාවක්‌. අපි පුහුණුකරුවන් සියලු දෙනා එක්‌ව තමයි මේ කටයුතු කරන්නෙ. අපේ වගකීම ක්‍රීඩකයන්ට තියෙන පීඩනය අපි අරගෙන ඒ අයට නිදහසේ ක්‍රීඩා කිරීමට දීමයි." යනුවෙන් පැවසීය.
අසේල විතාන
.jpg)
.jpg)
0 comments:
Post a Comment