සැමියා ගේ සැකය නිසා මානසික ව්‍යාකූලත්වයට පත් වූ මේධා

මේධායි මේධාගෙ අම්මයි ජීවත් වුණේ ගෙයි ඉස්තෝප්පු කෑල්ලෙ පුංචි කඩයක් කරලයි. ඒ කඩේ ටොෆි, සීනිබෝල, බුලත්විට , සිගරට් වගේ පුංචි පුංචි දේවල් තමයි තිබුණෙ. ඊට අමතරව ඒ කිට්ටුව ත්‍රීවීලර් පාක් එකේ අයට උදේට ඉඳි ආප්ප, පිට්ටු වගේ කඩයප්පන් හැදුවා. දවල්ට බත් පාර්සල් දහයක් දොළහක් හදල විකුණුවා. මේ ආදායමින් මේධායි අම්මයි අමාරුවෙන් ජීවිතේ ගෙන ගියා.
අජිත් මේ ත්‍රීවීලර් පාක් එකේ හිටපු එක රියැදුරෙක්. අජිත්ට
එයාගෙම ත්‍රිරෝද රථයක් තිබුණා. තමන්ගෙ බිරිඳගේ දික්කසාද වී සිටි අජිත් උදේට දවල්ට කෑවෙ තේ බිව්වෙ මේධලාගෙ පුංචි කඩෙන්. බොහොම නිවුණු තැන්පත් ගතිගුණ තියන තමන්ගේ පාඩුවේ ඉන්න කෙනෙක් විදිහට අජිත් මේධාගේ වගේම මේධාගේ අම්මගේත් හිත දිනාගෙන හිටියා.
දවසක් මේධා කඩේ තනියම හිටපු හවස් යාමයක කහට තේ එකක් බොන්න ආපු අජිත් එක්ක දීර්ඝ වේලාවක් කතා බහ කිරීමේ අවස්ථාව මේධාට ලැබුණෙ. ඒ අවස්ථාවේදී දැන ගන්න ලැබුණු විදිහට අජිත් ගෙ බිරිඳ එයාගෙන් දික්කසාද වීමට බලපෑ හේතුව බිරිඳගේ අනියම් සම්බන්ධයක්. බිරිඳගේ අවිවාහක සහෝදරයො දෙන්නෙක් කොළඹ රැකියාවල් කළා. ඒ දෙන්නා නතර වෙලා තියෙන්නෙත් අජිත්ලගෙ ගෙදරමයි. මොකද අජිත්ගෙ බිරිඳගෙ ගම මාතරිනුත් ගොඩක් එහා. රැකියාවට යාමේ පහසුව තකායි එයාලත් එහෙ නතර  වෙලා තියෙන්නේ. අන්තිමේ තමන්ගේ බිරිඳගේ අනියම් ප්‍රේමයට ඇගේ අයියල දෙන්නත් උදව් කරපු බව අජිත් මේධාට කිව්වා. දවසක් ගෙදර ලොකු ප්‍රශ්නයක් ඇති වෙලා අයියලා දෙන්නම අජිත්ට ගහලා. ඊළඟට තමන්ගෙ නංගිත් එක්කම ඔවුන් ආපහු යන්න ගිහින්. එදා ඉඳලා අජිත් ජීවත් වෙලා තියෙන්නෙ තනියම.
අජිත්ගෙ මේ විස්තර ඇහුවම මේධාට පුදුමාකාර දුකක් ඇතිවුණා. එයා කාගෙන හරි දැඩි ආදරයක් බලාපෙරොත්තු වුණු බව මේධාට තේරුණා. අන්තිමේ මේධාට හිතුණේ ඒ වගේ අහිංසක තැන්පත් ගතිගුණ තියන හොඳ කෙනෙක් තමන්ට ලැබෙනව නම් කියලා. දවසක් මේධාට ඒ බව අජිත්ට කිව්වම අජිත් හිනා වුණා.
ඔයා වගේ කෙනෙකුට මාව ගැළපෙන්නේ නෑ මේධා. මං එක පාරක් කසාද බැඳලා හිටපු කෙනෙක්. ඒත් ඔයා එහෙම නෙමේනේ. කියලා අජිත් කිව්වා. නමුත් එයා මොනව කිව්වත් මේධා ඔහුට ගොඩාක් ආදරේ කළා. ඒ නිසාම පස්සෙ ඔවුන් අතරෙ සම්බන්ධයක් ඇතිවුණා. කලින් නෝනාගෙන් දික්කසාද වෙලා හිටපු නිසා මේධාට අජිත්ව බඳින්න බාධාවක් තිබුණෙ නෑ. අජිත් කලින් විවාහ වෙලා හිටපු කෙනෙක් වුණත් මේධාගේ අම්මා අජිත්ට කැමති වුණේ එයාගෙ ගතිගුණ නිසයි.
විවාහයෙන් පස්සෙ මේධාත් අජිත්ගෙ ගෙදර පදිංචි වුණා. ඒ ගෙදර ඔවුන් දෙන්නා විතරමයි හිටියෙ. ඒ නිසා මේධාව තනියම දවල්ට ගෙදර  තියල යන්න බෑ කියලා අජිත් උදෙන්ම මේධාව අම්මගෙ කඩේට ඇරලුවා. මේධාගෙ අම්මටත් තනියම වැඩපළ කරගන්න අමාරු  නිසා අම්මාත් කැමති වුණා මේධා එනවට.
මේ අතර තවත් දෙයක් සිද්ධ වුණා. මේධාගෙ ගෙදර මේධා දවල්ට  හිටියට කඩේ ඉස්සරහට එනවට අජිත් කැමති වුණේ නෑ. කඩේට පිරිමි එන නිසා මේධාට කඩේ එළි පහලියට එන්න එපා කියල අජිත් දැඩි නීති රීති පනවල තිබුණ. බැරි වෙලාවත් මේධා කඩේ ඉස්සරහට ඇවිත් පිරිමි  කෙනෙක් එක්ක වචනයක් දෙකක් හරි කතා කරනවා දැක්කොත්  එහෙම එදා දවසම අජිත් කතා කළේ නෑ.
දවසක් මේධා කුස්සිය පැත්තෙ මිදුලෙ ඉඳන් පලා වගයක් සුද්ද කරමින් හිටියා. ඒ වෙලාවෙම කුස්සිය පැත්තෙන් වැසිකිළියට ගිය ත්‍රිරෝද රථ රියැදුරෙක් ආපහු එන ගමන් මේධාත් එක්ක කතා කර හිටියා. මේධාට දැන් මේ මනුස්සයට යන්න කියන්නත් බෑ. මේ මිනිහා යන්නෙත් නෑ. හිතුවා වගේම ඒ පුංචි වෙලාව තුළ අජිත් එතනට කඩා පාත් වුණා.
“උඹ එහෙනං කඩේ පිටිපස්සෙ රිංගගෙන කරන්නෙ මේවා නේද?” කියපු අජිත් මේධාව ඇදගෙන කාමරේට ගියා. මේධාට හතර මහ විළි ලැජ්ජාවක් වුණේ. එදා අජිත් මේධාට හොඳටම  ගැහුවා. මේධාගෙ අම්මයි ඇයත් එක්ක කතාකරමින් හිටපු  අර පිරිමි කෙනයි තමයි මේධාව බේරුවෙ.
ඒකෙන් අජිත්ගෙ සැකය තවත් වැඩි වුණා. ඊට පස්සෙ අම්මා කිව්වා ‘මගෙ කෙල්ලව මට ආයෙමත් අජිත්ලගෙ ගෙදරට එවන්න බෑ අජිත් මෙහෙන් යන්න’ කියලා. අජිත් ආපහු ගියේ තෝව මම ඉතුරු කරන්නෙ නෑ’ කියලා මේධාට තර්ජනය කරමිනුයි. ඊට පස්සෙ අම්මයි මේධායි ‍පොලීසියෙ ඇන්ට්‍රියකුත් දැම්මා. ‍පොලීසියෙන් දෙගොල්ලොම සමාදාන කරන්න හැදුවත් මේධා අජිත් ළඟට යන්න බය වුණා.
ඔය අතරෙ දවසක්  ත්‍රීවීලර් පාක් එකේම එක්කෙනෙක් මේධාගෙ අම්මාට කියල තියනවා අජිත් ගැන විස්තරේ.
එයාගෙ කලින් බිරිඳවත් ඔය විදිහට එයා නිතරම සැක කළාලු. අන්තිමේ එයා හැම තිස්සෙම ඉඳල තියෙන්නේ ඉණේ ‍පොඩි උල් පිහියක් ගහගෙනලු. ඒ එයාගෙ බිරිඳ කවුරු හරි එක්ක සම්බන්ධ බව දැන ගත්තොත් දෙන්නටම අනිනව කියලලු. මේ ප්‍රශ්නෙ උඩ  දවසක් ඒ දෙන්න රණ්ඩු වෙලා බිරිඳට පිහියෙන් අනින්න  එනකොට හොඳ වෙලාවට එක අයියා  කෙනෙක් ගෙදර ඇවිත්. එයා අජිත්ට එදා හොඳටම ගහලා. ඊට පස්සේ තමයි අනික් අයියාටත් පණිවුඩේ යවලා තමන්ගෙ නංගිවත් අරන් ඒ ගෙදරින් පිට වෙලා තියෙන්නෙ.
මේ කතාව ඇහුවා විතරයි මේධාට දැනුණේ විශාල බයක්. තමන් මර උගුලකින් බේරුණා  කියලා හිතන් හිටියත් කොයි වෙලාවෙ හරි අජිත් ඇවිත් තමාට පිහියෙන් අනී කියලා මේධා හිටියෙ විශාල බයකින්. අන්තිමේ මේධා හීනෙනුත් බය වෙලා කෑ ගහන්න පටන් ගත්තා.  ඒ බය ඇරෙන්න මනෝ වෛද්‍ය ප්‍රතිකාර පවා ගන්න සිද්ධ වුණත් කොයි වෙලාවෙ හරි අජිත් තමාව මරාවි  කියන බය තවමත් ඇගේ හිතට වද දෙනවා.

ඉන්දු පෙරේරා