ජයසූරිය මහතාගේ ආරක්ෂාව සදහා ගෙන ඇති ක්‍රියාමාර්ග පිළිබඳව පැහැදිලි කිරිම සළකා බැලූ කොළඹ ප්‍රධාන මහේස්ත්‍රාත්වරයා කියා සිටියේ ඒ පිළිබඳව අධිකරණය සෑහීමකට පත්වන බව ය.
ශ්‍රී ලංකා නීතිඥ සංගමයේ සභාපති උපුල් ජයසූරිය මහතා පසුපස සැකකටයුතු පිරිසක් පැමිණෙන බවත් ඉන් සිය ආරක්ෂාව පිළිබඳව ගැටලු මතුව ඇති බවත් දක්වමින් ගොනු කළ පැමිණිල්ල පිළිබඳ විභාගය අද යළිත් කොළඹ ප්‍රධාන මහේස්ත්‍රාත් ගිහාන් පිලපිටිය මහතා හමුවේ කැඳවනු ලැබිණි.
පසුගිය සිකුරාදා ප්‍රධාන මහේස්ත්‍රාත්වරයා දැනුම් දුන් පරිදි අද ජ්‍යෙෂ්ඨ නියෝජ්‍ය පොලිස්පති අනුර සේනානායක මහතා අධිකරණය හමුවේ පෙනී සිටිමින් කරුණු පැහැදිලි කළේය
ඔහු අධිකරණයට දන්වා සිටියේ නීතිඥ සංගමයේ සභාපතිවරයාගේ ආරක්ෂාව වෙනුවෙන් පොලිස් නිලධාරීන් 27 දෙනෙකු යොදවා ඇති බව ය.
නමුත් පෞද්ගලික ආරක්ෂාවට දෙදෙනෙකු ලබාදීම සම්බන්ධයෙන් තීරණය කළ යුත්තේ නීතිය හා සාමය පිළිබඳ අමාත්‍යාංශයේ ලේකම්වරයා බව ඔහු පෙන්වා දුන්නේය.
විදේශගතව සිටින ලේකම්වරයා අද පැමිණීමට නියමිත බවත් ඔහු දැනුවත් කිරීමෙන් පසුව ඉදිරි පියවර ගන්නා බව ත් ජ්‍යෙෂ්ඨ නියෝජ්‍ය පොලිස්පතිවරයා අධිකරණය හමුවේ කියා සිටියේය.
අනුර සේනානායක මහතා පැවසුවේ, පසුගිය 31 වන දා උපුල් ජයසූරිය මහතා පසුපස පැමිණි බව කියන පිරිස ආවේෂණ රාජකාරී කළ බුද්ධි අංශ නිලධාරීන් බව ය.
නීතිඥ සංගමය ලබාදුන් ඡායාරූප පරීක්ෂා කිරීමෙන් පසුව එය තහවුරු කළ බව ඔහු දැනුම් දුන්නේය.
නමුත් ජුලි මස 15 වන දා කළ මූලික පැමිණිල්ලට අදාළ විමර්ශන සිදුකරන කොළඹ අපරාධ කොට්ඨාසය විසින් පරීක්ෂා කළ සී.සී.ටී.වී. දර්ශනවලට අනූව ජයසුරිය මහතා පිටුපස යතුරු පැදියක් පැමිණ ඇති බව තහවුරු වන බව ද සේනානායක මහතා සඳහන් කරනු ලැබිණි.
ඔහු කියා සිටියේ තමා සම්බන්ධයෙන් නීතිඥ සංගමයේ සභාපතිවරයා කර ඇති ප්‍රකාශ මත මෙම පරීක්ෂණ මෙහෙයවීමෙන් ඉවත්වූ බව ය.
මේ වනවිට පොලිස්පතිවරයාගේ නියමයෙන් ජ්‍යෙෂ්ඨ නියෝජ්‍ය පොලිස්පති ගාමිණි නවරත්න මහතා යටතේ පරීක්ෂණ සිදුවන බව අනුර සේනානායක මහතා අධිකරණයට දැනුම් දුන්නේය.
ජ්‍යෙෂ්ඨ නියෝජ්‍ය පොලිස්පතිවරයා සඳහන් කළේ, තමන්‍ පිළිබඳ මහජනතාව පූර්ණ විශ්වාසයකින් කටයුතු කරන බැවින් මැතිවරණයකට ඉදිරිපත් වුවහොත් ලක්ෂ 3ක ඡන්ද ප්‍රමාණයක් පහසුවෙන් ලබා ගත හැකි බව ය.
වැඩිදුර විභාගය මේ මස 25 වනදා දක්වා කල් තැබුණි.
.jpg)
.jpg)
0 comments:
Post a Comment