UNP එකේ ගැලවුම්කාරයා

"සජිත්ට යූ.ඇන්.පී. එකේ නියෝජ්‍ය නායකකම දෙනවට කවුද විරුද්ධ?"
සජිත්ට යූ.ඇන්.පී. එකේ නියෝජ්‍ය නායකකම දෙනවාට යූ.ඇන්.පී.කාරයකු නම් විරුද්ධ නොවන බව හොඳටම ෂුවර්ය. මොකද මහින්දට තරගයක් දෙන්න නම් සජිත් යූ.ඇන්.පී. එකේ ඉහළ තැනකට එන්න ඕන කියන එක සජිත්ගේ හතුරෝත් පිළිගනිති. ඉතින් සජිත්ට යූ.ඇන්.පී. එකේ නියෝජ්‍ය නායකකම දෙන්න එපා කියනවා නම් ඒ අනිවාර්යෙන්ම යූ.ඇන්.පී. එකේ හතුරකු වෙන්න ඕනෑය. මහින්දගේ මිතුරකු වෙන්න ඕනෑය.


සජිත්ට යූ.ඇන්.පී. එකේ නියෝජ්‍ය නායකකම නොලැබෙනවා නම් ඒකට වැඩියෙන්ම කැමැති වෙන්න ඕනෑ වෙන කවුරුවත් නොව මහින්දය. මොකද සජිත්ට නියෝජ්‍ය නායකකම ලැබුණොත් සජිත් හම්බන්තොට තවත් බලවත් වෙයි. තමන්ගේ බලකොටුව වෙච්ච හම්බන්තොට සජිත්ගේ බලය වැඩි වෙනවාට මහින්ද කොහෙත්ම කැමැති වෙන්නේ නැත. ඒ වාගේම අනාගත යූ.ඇන්.පී. නායකයා හම්බන්තොටින් බිහිවෙනවාටත් මහින්ද කැමැති වෙන්නේ නැත. මොකද යූ.ඇන්.පී. එකේ ජනප්‍රිය නායකයකු හම්බන්තොට ශක්තිමත් වීම නාමල්ලාගේ අනාගතයට එච්චර හොඳ නැත.


ඉතින් එහෙම බලනකොට සජිත්ට යූ.ඇන්.පී. එකේ නියෝජ්‍ය නායකකම ලැබෙන එක වළක්වන්න ලොකුම ගේම ගහන්න ඕනෑ මහින්දත් නාමලුත්ය. හැබැයි පුදුමය කියන්නේ මහින්දටත් නාමල්ටත් කලින් ඒ ගේම ගහන වැඩේ කරු භාරගෙන තිබීමය.


උෟව ඡන්දය තියන්න කලින් සජිත්ට නියෝජ්‍ය නායකකම දීලා පක්‍ෂය ශක්තිමත් කරන්න රනිල් තීරණයක් අරගෙන තිබුණේය. හැබැයි රනිල්ගේ ඒ තීරණය ක්‍රියාත්මක කරන්න කරු ඉඩ දුන්නේ නැත. සජිත්ට නියෝජ්‍ය නායකකම දුන්නොත් තමන්ගේ පොදු අපේක්‍ෂක සිහිනය බොඳවෙලා යයි කියලා කරු බය වුණේය. ඒ නිසා කරු, රවිත්, රුවනුත් එක්ක එකතු වෙලා සජිත්ට නියෝජ්‍ය නායකකම දෙන එක වළක්වන්න ලොකු කුමන්ත්‍රණයක් දියත් කළේය. කරු මේ කුමන්ත්‍රණයට හවුල් කරගත් අනෙක් දෙදෙනා වන රවිටත්, රුවන්ටත් ඕනෑ වෙලා තිබෙන්නේ සජිත්ට නියෝජ්‍ය නායකකම ලැබෙන එක වළක්වන්නය. මොකද සජිත්ට නියෝජ්‍ය නායකකම ලැබුණොත් තමන්ගේ දේශපාලනය ඉවරයි කියලා රවි හිතයි. තමන්ට ඊළඟට යූ.ඇන්.පී. එකේ නායකයා වෙන්න බැහැ කියලා රුවන් හිතයි. ඉතින් කරුගේත්, රවිගේත්, රුවන්ගේත් මේ තුන් බිය නිසා මේ තුන්බෑ ජටිලයන් එකට එකතු වෙලා රනිල් - සජිත් එකතුවට වළ කැපූහ. සජිත්ට නියෝජ්‍ය නායකකම දෙන්න රනිල් අරන් තිබූ තීරණයට කටුව ගැසූහ.


අවංකභාවය, විනිවිදභාවය, සහජීවනය, එක්සත්කම ගැන පැය විසිහතරේම කතා කරන ජාතික ඇඳුමක් ඇඳ සිංහ කොඩියක් කමිසයේ ගසාගෙන නිතරම එහෙ මෙහෙ යන ජීවිතයේ සැ¼දෑ සමය ගත කරන කරුණාරත්න ජයසූරිය බල තණ්හාව නිසා එක්සත් ජාතික පක්‍ෂයේ අනාගතය විනාශ කරන්නේ ඔන්න ඔය විදියටය.
රාජපක්‍ෂ ආණ්ඩුව ගැන ජනතාව අතර යම් මට්ටමක අප්‍රසාදයක් ගොඩනැඟිලා තියෙන මේ මොහොතේ කරුලා, රවිලා, රුවන්ලා හරි විදියට කරන්න ඕනෑ රනිල් - සජිත් සමඟිය ගොඩනඟා පක්‍ෂය ශක්තිමත් කරන එකය. හැබැයි එක්සත් ජාතික පක්‍ෂයේ හා එක්සත් ජාතික පාක්‍ෂිකයන්ගේ අවාසනාවට එක්සත් ජනතා නිදහස් සන්ධානයේ හා මහින්දගේ වාසනාවට නොවෙන්නෙත් ඒකමය.


පාවාදීම් ගණනාවකට සම්බන්ධ, ද්‍රෝහීවීම් ගණනාවකට සම්බන්ධ, බෙලි කැපීම් ගණනාවකට සම්බන්ධ, පිහියෙන් ඇනීම් ගණනාවකට සම්බන්ධ කරුණාරත්න ජයසූරිය තමන්ට රටේ නමක් හදලා දුන්න රණසිංහ ප්‍රේමදාසගේ පුතාට කරන ද්‍රෝහිකම ගැන එක අතකින් පුදුම වෙන්න දෙයක් නැත. මොකද කරුගේ ඉතිහාසය පිරිලා තියෙන්නේ කුමන්ත්‍රණ, පාවාදීම්, පිහියෙන් ඇනීම් හා බෙලි කැපීම්වලිනි.


සභාපතිකමක් හා තානාපතිකමක් දීලා තමන්ව රටට හඳුන්වා දුන් රණසිංහ ප්‍රේමදාසගේ පුතාට ද්‍රෝහී වෙන්න පුළුවන් නම්, එක්සත් ජාතික පක්‍ෂයේ මන්ත්‍රිවරුන් 17 දෙනකු එක්ක ආණ්ඩුවට ගිහිල්ලා යූ.ඇන්.පී. එකට ද්‍රෝහී වෙන්න පුළුවන් නම්, ආපහු එක්සත් ජාතික පක්‍ෂයට අරන් නියෝජ්‍ය නායකකමක් දුන්න රනිල් එක්ක නායකත්වයට තරග කරලා රනිල්ට ද්‍රෝහී වෙන්න පුළුවන් නම්, ඊළඟ ජනාධිපතිවරණයේ පොදු අපේක්‍ෂකයා වන අදහසින් රනිල්ව කපන්න කුමන්ත්‍රණය කරන්න පුළුවන් නම් එහෙව් කෙනකුට ජනතාවට ද්‍රෝහී වෙනවා කියන එක, රටට ද්‍රෝහී වෙනවා කියන එක මහ ලොකු දෙයක් නොවේ.
ඇත්තම කිව්වොත් එක්සත් ජාතික පක්‍ෂයට උදාවෙලා තියෙන ස්වර්ණමය අවස්ථාව විනාශ කරලා දාන්න කරු රවි හා රුවන් එක්ක එකතු වෙලා ගහන ගේමේ කොනක මහින්දත් ඉන්න බව නම් ෂුවර්ය. මොකද සජිත්ට විරුද්ධ සටනේ සම්පූර්ණ වාසිය මහින්දට යන නිසා මහින්ද කරුලාගේ, රවිලාගේ, රුවන්ලාගේ සජිත් විරෝධී සටනට සහාය නොදෙනවා කියලා කියන්න බැරිය.


එදා කොළඹ නගර සභා මැතිවරණය වෙලාවේ පොදු පෙරමුණ කොළඹ ගහපු පෝස්ටරය කොච්චර ඇත්තද කියලා හිතෙන්නේ මෙන්න මේ වාගේ වෙලාවටය. එදා කොළඹ නගරාධිපතිකමට ඉල්ලපු කරු කොළඹ පුරාම පෝස්ටර් ගැහුවේ "ආවොත් කරු පායයි හිරු" කියලාය. ඒකට උත්තර දෙමින් පොදු පෙරමුණ කොළඹ ගහපු පෝස්ටරයේ තිබුණේ "ආවොත් කරු පෙනේවි තරු" කියලාය. අද කරු එක්සත් ජාතික පක්‍ෂයටත්, යූ.ඇන්.පී. පාක්‍ෂිකයන්ටත් පෙන්නන්නේ එදා කිව්ව අන්න ඒ තරුය. කරු නිසා මහින්දට පායලා තියෙන්නේ අන්න ඒ හිරුය.


සඳුන් ජීවන්ත