මම එළියට ආපු දවසට උඹලට කරන දේ බලාගනිල්ලා කියු වාස් ගුණවර්ධනට ඇප

"ශානි මම මිනීමරුවෙක්. මම එළියට ආපු දවසට උඹලට කරන දේ බලාගනිල්ලා" යනුවෙන් පවසා රහස් පොලිසියේ සහකාර පොලිස් අධිකාරී ශානි අබේසේකර මහතාට බැන තර්ජනය කිරීම සම්බන්ධයෙන් අධි චෝදනා ලැබ රිමාන්ඩ් භාරයට පත් කර සිටි හිටපු නියෝජ්‍ය පොලිස්පති වාස් ගුණවර්ධන මහතා ඇප මත මුදාහරින ලෙස කොළඹ මහාධිකරණ විනිසුරු අයිරාංගනී පෙරේරා මහත්මිය ඊයේ (28දා) නියෝග කළාය.


රුපියල් 25000ක ශරීර ඇපයක් මත විත්තිකාර වාස් ගුණවර්ධන මහතා මුදාහරින ලෙස නියම කළ විනිසුරුවරිය විදේශ ගමන් බලපත්‍රය මහාධිකරණය හමුවට භාර දෙන ලෙස විත්තිකරුට නියම කළාය.
ඇප තැබීමෙන් අනතුරුව පැමිණිල්ලේ සාක්ෂිකරුවන්ට කිසිදු ආකාරයක තර්ජනයක්, බලපෑමක් එල්ල නොකරන ලෙසට විනිසුරුවරිය විත්තිකාර වාස් ගුණවර්ධන මහතාට අවවාද කළාය.


විත්තිකාර වාස් ගුණවර්ධන මහතා මේ නඩුවේදී ඇප මත මුදාහරිනු ලැබුවද ඔහුට එරෙහිව පවරා තිබෙන මොහොමඩ් සියාම් ඝාතන නඩුවට සහ ගිනිඅවි සන්තකයේ තබා ගැනීමේ නඩුවට තවදුරටත් රිමාන්ඩ් භාරයට පත් කර ඇති හෙයින් ඔහුට යළි බන්ධනාගාරයට යෑමට සිදු විය.
රහස් පොලිස් මූලස්ථානයේදී විත්තිකරුව අත්අඩංගුවට ගන්නා අවස්ථාවේදී 2013 ජුනි 10 වැනි දින රහස් පොලිසියේ සහකාර පොලිස් අධිකාරි ශානි අබේසේකර, රහස් පොලිසියේ විශේෂ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක රන්ජිත් මුණසිංහ, පොලිස් පරීක්ෂක ලලිත් දිසානායක යන මහත්වරුන් තිදෙනාට බැන තර්ජනය කිරීම සම්බන්ධයෙන් නීතිපතිවරයා විසින් විත්තිකාර වාස් ගුණවර්ධන මහතාට එරෙහිව මෙම නඩුව කොළඹ මහාධිකරණය හමුවේ පවරා තිබිණි.