කබ්රාල්ගේ ලිපි ඇමෙරිකා සඟරාවල පළකරවා ගන්න ලක්ෂ 888ක් ගෙවලා

තොම්සන් ඇඞ්වයිසරි ගෲප් (TAG) නමැති ඒජන්සි ආයතනයක් හරහා තමාගේ ලිපි ඇමෙරිකාවේ සඟරාවල පළකරවා ගැනීම සඳහා මෙරට මහජන බදු මුදල්වලින් රුපියල් ලක්ෂ අටසීය අසූ අටක් (ඇමෙරිකන් ඩොලර් 683635) ගෙවීමට මහබැංකු අධිපති අජිත් නිවාඞ් කබ්රාල් මහතා කටයුතු කර ඇති බව එක්සත් ජාතික පක්ෂයේ බස්නාහිර පළාත් සභා මන්ත‍්‍රී නිරෝෂන් පාදුක්ක මහතා පවසයි.

බස්නාහිර පළාත් සභාව රැස් වූ අවස්ථාවේ එය අමතමින් ඔහු සඳහන් කලේ මෙම ගනුදෙනුව සම්බන්ධීකරණය කළ ඇමෙරිකාවේ සේවය කරන ටැක්සි රියදුරෙකු වන තිලක් මොහාන් නමැත්තාට පසුගිය වසරේ මාර්තු 21 වැනිදා සිට අගෝස්තු තුන්වැනිදා දක්වා ඇමෙරිකන් ඩොලර් 34675 ක් (රුපියල් ලක්ෂ 45ක්) ගෙවා තිබූ බවත්,මේ වනවිට ශ‍්‍රී ලංකා මහ බැංකුව විසින් මාසිකව ඩොලර් 7000 (රුපියල් ලක්ෂ 9) වැටුපක්ද ඔහුට ගෙවමින් තිබෙන බවත්ය.

මෙම කිසිම ගනුදෙනුවක් සම්බන්ධයෙන් කැබිනට් මණ්ඩලයේ අනුමැතිය හෝ පාර්ලිමේන්තුවට දැනුම්දීමක් කර නොමැති බවද ඔහු කියා සිටියේය.

ඉහත සදහන් ටැක්සි රියදුරා (පිළියන්දල ප‍්‍රදේශයේ උපත ලද) පසුගිය මාස කිහිපය තුළ ශී‍්‍ර ලංකාවේ සංචාරය කර ඇති බවත්,එහි සියලූ වියදම්ද දරා ඇත්තේ ශ‍්‍රී ලංකා මහ බැංකුව විසින් බවත් හෙතෙම වැඩිදුරටත් පැවසීය.