සුනාමියෙන් මහින්ද.........එල්නිනෝවෙන් කවුද?

2004 ජූලි මාසයේ වගේ ජේ‍යාතිෂවේදිනියක් 'ඉරුදින' පුවත්පතට අපූරු අනාවැකියක් කීවාය. ඇය කීවේ 2004 අග ලංකාවට ජලයෙන් මහා විපතක් වන බවත්, ඉන් විශාල විනාශයක් සිදුවන බවත්ය. එම විනාශයට පසු රටට අලුත් නායකයකු පහළ වෙනවා යැයි ඇය කීවාය. ඒ නායකයා රනිල් වික්‍රමසිංහ යැයිද ඇය අඟවා තිබිණි. 2004 දෙසැම්බරයේ සුනාමිය ආ පසු ඇයගෙන් අනාවැකි අහන්න මිනිස්සු පෝලිමේ ආහ. සුනාමිය ගැන කීවා සේ අලුතින් එන නායකයා රනිල් යැයි යූ.ඇන්.පී.කාරයෝ සිතූහ.

ඒත් සුනාමියෙන් බිහි වූ අලුත් නායකයා රනිල් නොව මහින්දය. සුනාමිය එනවිට චන්ද්‍රිකා හිටියේ පිටරටය. මහා විපත කරට ගන්න සිදු වූයේ අගමැති ලෙස මහින්දටය. චන්ද්‍රිකා පිටරට යනවිට මහින්දව වැඩ බලන ජනාධිපති ලෙස පත්කර ගියේ නැත. ඒ සුනාමි විපත නිසා මහින්ද වැඩ බලන ජනාධිපති ධුරය සියතට ගත්තේය. චන්ද්‍රිකාටත් විපතේ මහත දුටු විට ඒ වේලාවේ එයට එරෙහි වී දේශපාලනය කරන්න හැකියාවක් තිබුණේ නැත. මහින්ද ඇමැති මණ්ඩලය කැඳවීය. අමාත්‍යංශ ලේකම්වරුන් කැඳවීය. සර්ව පාක්ෂික රැස්වීමක් කැඳවීය. මේ වෙනකොට මහින්දට විමල් වීරවංශලා ඇතුළු ජ.වි.පෙ. සමඟ හොඳ හිතක් තිබුණේ නැත. ඒත් විමල්ලාට, ජ.වි.පෙ.ට මහින්ද සමඟ වැඩ කිරීමට සිදුවිය. මහින්දට ජ.වි.පෙ. සෙට් වුණේ මෙහෙම එකට වැඩ කරද්දීය. වෙනකක් තබා මහින්ද සුනාමි විපත බලන්න යාපනයට යනවිට විමල්වද රැගෙන ගියේය.


ඇත්තටම චන්ද්‍රිකාගේ ආණ්ඩුව කැඩෙන්නේද සුනාමිය නිසාය. චන්ද්‍රිකාගේ ආණ්ඩුව සුනාමියෙන් විපතට පත්වූවන්ට ආධාර ලබා ගැනීම සඳහා එල්.ටී.ටී.ඊ.ය සමඟ අස්සන් කරන සුනාමි සහන මණ්ඩල ගිවිසුමට එරෙහිව ආණ්ඩුවෙන් එළියට යන ජ.වි.පෙ., ආණ්ඩුවට බහුතරය අහිමි කරනු ලැබීය.
සුනාමිය නොවන්නට චන්ද්‍රිකා නව ව්‍යවස්ථාවක් හඳුන්වා දී ඊළඟ මහ ඡන්දයට තරග කරන්න ජ.වි.පෙ. සමඟ සාකච්ඡා කරමින් සිටියාය. එම ව්‍යවස්ථාවෙන් විධායක ජනාධිපති ක්‍රමය අහෝසි කිරීමට නියමිතව තිබිණි. ඒ සඳහා කාලය ලබා දීමට හිටපු අගවිනිසුරු සරත් සිල්වා චන්ද්‍රිකා රහසේ දිවුරුම් දුන් බවත්, ඒ අනුව චන්ද්‍රිකාගේ නිල කාලය 2006 නොවැම්බර් තෙක් වලංගු බවත් රනිල්ගේ ආණ්ඩු කාලයේම පවසා තිබිණි. සරත් සිල්වා රහස් දිවුරුම එළියට දැම්මේ චන්ද්‍රිකාව 2006 තෙක් ජනාධිපති ධුරයේ තියන්නටය.


ඒත් සුනාමිය එය වෙනස් කරනු ලැබීය. සුනාමි සහන මණ්ඩලය නිසා චන්ද්‍රිකාගේ ආණ්ඩුව කඩාගෙන වැටී ජ.වි.පෙ. පාරට බැස්සවිට සරත් සිල්වා ද වෙනස් විය. චන්ද්‍රිකාගෙන් කැඩෙන සරත් සිල්වා සහ ජ.වි.පෙ. දිනාගන්න මහින්ද සමත් විය. අන්තිමේදී ජනාධිපතිවරණය 2005දී පැවැත්විය යුතු යැයි සරත් සිල්වා තීන්දුවක් දුන්නේය. මහින්දට ජනාධිපතිවරණයට තරග කිරීමට අවස්ථාව ලැබුණේ ඒ තීන්දුව නිසාය.
මේ පරණ කතාව මතක් වූයේ 2014දී ලංකාවට සුනාමියටත් වඩා භයානක මහා විනාශයක් සිදු කරන එල්නිනෝවක් එනවා යැයි ජේ‍යාතිෂවේදීන් නොව විද්‍යාඥයන් කියන අනාවැකිය අහද්දීය. මෙය සිදුවිය හැක්කේ 2014 දෙසැම්බරයේ යැයි ඔවුහු පවසති. මෙවැනි විනාශයක් සිදු වන්න යනවා නම් මහින්දට හදිසි ජනාධිපතිවරණයක් කැඳවන්න පුළුවන්ද කියන ප්‍රශ්නය මතුවෙයි.


මහින්ද තෙවැනි වරටත් ජනාධිපතිවරණයකට යන්නේ ආණ්ඩු ක්‍රම ව්‍යවස්ථාව වෙනස් කළ 18 වැනි ව්‍යවස්ථා සංශෝධනයෙන්ය. ඒ ව්‍යවස්ථා සංශෝධනය සම්මත කළේ මහජන වරම නියෝජනය කරන මන්ත්‍රිවරුන්ගෙන් සැදුම් ලත් තුනෙන් දෙකක බලයකින් නොවේ. ඒ ව්‍යවස්ථාව සංශෝධනය කරන්න මහින්දට 2010දී ජනතාව ජන වරමක් දුන්නේ නැත. මහින්දට 2010දී තුනෙන් දෙකක බලයක් ජනතාව දුන්නේ නැත. මහින්ද තුනෙන් දෙකේ බලය ගත්තේ එ.ජා.ප. මන්ත්‍රිවරුන් බා ගෙනය. ඒ අනුව මේ ව්‍යවස්ථා සංශෝධනය මහජන වරමට පිටු පා සම්මත කර ගත් එකකි. ඒ වගේම ඒ ව්‍යවස්ථා සංශෝධනය යටතේම දෙවැනි ධුර කාලයේ නිල කාලය අවසන් වීමට පෙර ජනාධිපතිවරණයකට යෑමත් ව්‍යවස්ථා විරෝධී බව හිටපු අගවිනිසුරු සරත් සිල්වා ප්‍රකාශ කර ඇත.
ව්‍යවස්ථාව විකෘති කිරීම යනු මහජන මතය විකෘති කිරීමකි. එලෙස ව්‍යවස්ථාව විකෘති කොට බලය රැක ගන්න උත්සාහ කළ හැමෝටම ස්වභාධර්මයෙන්ම දඬුවම් ලැබී ඇත. ඉතිහාසය එයට සාක්ෂි දරයි.


1970 - 77 ආණ්ඩු කාලයේ 1975 පවත්වන්න නියමිත මහ මැතිවරණය වසර දෙකකින් දික්කර ගන්න එවකට අගමැතිනි බණ්ඩාරනායක මැතිනිය සමත් වූවාය. ඇය ඒ සඳහා පාර්ලිමේන්තුවේ තුනෙන් දෙකක බලය ප්‍රයෝජනයට ගත්තාය. ඒ වෙලාවේ නිල කාලය වසර දෙකකින් දීර්ඝ කර ගැනීමේ යෝජනාව පිටුපස ලොකුම කාර්යභාරය ඉටු කළේ ල.ස.ස.ප. නායකයන් වූ ඇන්. ඇම්. සහ කොල්වින්ය. මේ වැඩේ මැතිනියගේ ඔළුවට දැම්මේත් මේ දෙදෙනාය. කෙසේ හෝ නිල කාලය දීර්ඝ කර ගත්තේය. වැඩි කලක් ගියේ නැත. මේ වැඩේ නිර්මාතෘවරුන් දෙදෙනා වූ ඇන්.ඇම්. සහ කොල්වින් සමඟ ගැටුම් ඇති කරගෙන මැතිනිය ඔවුන්ව ඇමැතිකම්වලින් ඉවත් කරනු ලැබීය. ආණ්ඩුව 1977 ඡන්දයට ගියේ වැටිලාය. මැතිනිය 1975 මහ ඡන්දයට ගියා නම් දිනන්නත් ඉඩ තිබිණි. පැරදුණත් විපක්ෂ නායිකාව වීමට තරම් මන්ත්‍රි බහුතරයක් ලබන්න ඉඩ තිබිණි. එහෙම වූවා නම් ජේ. ආර්.ට ව්‍යවස්ථාව වෙනස් කරන්න තුනෙන් දෙකක බලයක් හිමි වන්නේ නැත. ව්‍යවස්ථාව විකෘති කොට බලය රැක ගන්න ගිහින් මැතිනියට විපක්ෂ නායකකමත් නැති විය.


ජේ.ආර්. ගේ 1982 ජනමත විචාරණයත්, ව්‍යවස්ථාව විකෘති කිරීමකි. 1983 කළු ජූලිය ඔහු එයට ගෙවපු වන්දියය. එතැන් සිට ගෙදර යන තෙක් ජේ.ආර්. හිටියේ උතුරේ යුද්ධයෙන් කර වටක් එරිලාය. 1987 දී දකුණේත් යුද්ධයක් ඇවිළිණි. ජේ.ආර්. 1982 මහ මැතිවරණයක් පවත්වා ජ.වි.පෙ.ට පාර්ලිමේන්තුවට එන්න ඉඩ දුන්නා නම් 1987 දකුණේ යුද්ධයක් ඇවිළෙන්නේ නැත. මේ යුද්ධ දෙකෙන්ම සිදු වූයේ යූ.ඇන්.පී.ය සහ එහි නායකයන් විනාශ වීමය.


චන්ද්‍රිකා හොරෙන් දිවුරුම් දීම නීත්‍යනුකූල කොට 2006 තෙක් ජනාධිපති ධුරයේ සිට ව්‍යවස්ථාව වෙනස් කොට මහ මැතිවරණයකට තරග කරන්න හිටියා නම් ඒ සැලසුම කඩාකප්පල් කළේ සුනාමියය. මන්ද හොරෙන් දිවුරුම් දීම සහ 2006 තෙක් ජනාධිපති ධුරයේ සිටීමද ව්‍යවස්ථාව විකෘති කිරීමකි.
දැන් මහින්ද ජනාධිපතිවරයකුට ධුර කාලය දැරිය හැක්කේ දෙවතාවක් පමණක් යැයි ජේ.ආර්. හදපු ව්‍යවස්ථාව මහජන වරමකින් පත් වූ තුනෙන් දෙකක පාර්ලිමේන්තු බලයකින් නොව එ.ජා.ප. මන්ත්‍රිවරුන් බා ගෙන විකෘති කොට හදා ගත් තුනෙන් දෙකක බලයකින් වෙනස් කොට තෙවැනි වරටත් ජනාධිපතිවරණයකට තරග කරන්න සූදානම් වීමද ව්‍යවස්ථාව විකෘති කිරීමකි.


මහින්ද ජනාධිපතිවරණයට යන්න සූදානම් වෙන දෙසැම්බරයේ එල්නිනෝවක් එනවා යැයි කියන කතාව තුළ තියෙන්නේ රටක දෛවය එරට පුරවැසියකුට රාජ්‍ය නායකකම් කරන්න දෙන කාලය වෙනස් කරන්න ඒ පුරවැසියාට හෝ ඔහුගේ දෛවයට නොහැකි බවය.
එල්නිනෝවක් ඇවිත් මහා විපතක් සිදු වුණොත් හදිසි ජනාධිපතිවරණයකට යන්න මහින්දට බැරිය. මහින්දට සිදු වන්නේ විපතින් ගොඩ එන්න ජාත්‍යන්තර ආධාර පැතීමය. සුනාමිය ආ වෙලාවේ චන්ද්‍රිකාත් මෙය කළාය.
'ආධාර වැඩි කරන්න නම් එල්.ටී.ටී.ඊ.ය එක්ක ගිවිසුමකට යන්න...'


ජාත්‍යන්තරය චන්ද්‍රිකාට කීහ. ඒ වෙනකොටත් සුනාමි විපතින් රට ගොඩ ගන්න ජාත්‍යන්තරය විශාල වශයෙන් ආධාර ලබා දී තිබිණි. ආධාර වැඩි කරන්න යැයි චන්ද්‍රිකා කළ ඉල්ලීමට ජාත්‍යන්තරය ප්‍රතිචාර දැක්වූයේ එලෙසය. චන්ද්‍රිකා එල්. ටී. ටී. ඊ.ය සමඟ සුනාමි සහන මණ්ඩලයට අස්සන් කළේ ජාත්‍යන්තර බලපෑමටය. සුනාමි විපතින් රට මුදා ගන්න ඇයට වෙනත් විකල්පයක් නොවීය. විද්‍යාඥයන් කියන පරිදි එල්නිනෝවක් ආවොත් මහින්දට විපතින් රට මුදා ගන්න ආධාර අවශ්‍ය වේ. ආධාර ලබා ගන්න ජාත්‍යන්තර බලපෑම්වලට යටත් වීමට සිදුවේ.
ඒ වේලාවට මහින්දගේ අවසානයත් චන්ද්‍රිකාගේ අවසානය වගේම ලියවෙයිද කියන්න දන්නේ නැත. හැබැයි ප්‍රශ්නය මහින්ද සුනාමියෙන් මතු වූවා වගේ එල්නිනෝවෙන් මතු වන නායකයා කවුද කියන එකය.