ඌව මැතිවරණ මෙහෙයුම් කටයුතු අතරේ එක්සත් ජාතික පක්ෂයේ නියෝජ්‍ය නායක ධුරය සම්බන්ධයෙන්ද මාතෘකාව ඇදී ආවේ එක්සත් ජාතික පක්ෂයේ සම්මේලනයක් සමගය. එක්සත් ජාතික පක්ෂයේ සංවත්සරයේදී රනිල් වික්‍රමසිංහ මහතා සහ සජිත් ප්‍රේමදාස මහතා එකට නොසිටින බවට පළවූ මත මිත්‍යාවක් බවට පත්කරමින් ඔවුන් එකම වේදිකාවට ගොඩවිය. පස්සර පැවැති එ.ජා.ප. සම්මේලනයට පෙර පක්ෂයේ මහ ‍ලේකම් තිස්ස අත්තනායක මහතාට කතා කළ සජිත් ප්‍රේමදාස මහතා තමන් වේදිකාවට පැමිණිය යුත්තේ කොයි මොහොතේ දැයි දැනුම් දෙන ලෙස ඉල්ලා සිටියේය.
 ඒ අනුව කලින් සැලසුම් කර තිබූ පරිදි මහ ‍ලේකම්ගේ දැනුම්දීම අනුව සජිත් වේදිකාවට ගොඩවූයේ එක්සත් ජාතික පාක්ෂිකයන්ගේ ඔල්වරසන් හඬ මැදය. එම අවස්ථාවේ එ.ජා.ප. මන්ත්‍රී විජේදාස රාජපක්ෂ මහතාට දුරකථන ඇමතුමක් ලැබුණු බැවින් ඔහු නැගිට ගියේය. ඉන් අනතුරුව සජිත් විරෝධී මතයක් නියෝජනය කරන රවි කරුණානායක මන්ත්‍රීවරයාද දුරකථන ඇමැතුමක් ලැබුණ බව පසක් කරමින් නැගිට ගියද ඔහු යළි වේදිකාවට ආවේ නැත. නමුත් දුරකථන ඇමැතුම අවසන් වූ විජේදාස රාජපක්ෂ මහතා යළිත් වේදිකාවට පැමිණියද රවි කරුණාරත්න මන්ත්‍රීවරයා යන්නට ගිය බව සමුළුවේ සංවිධායකයන් සඳහන්  කළේය.