ගල්ගමුව මීගලෑව ධනිඳු දරුවා පැහැරගෙන යැමේ සිද්ධියේ මහ මොළකරු ලෙස කටයුතු කළ නීතිඥවරියකගේ සැමියා වූ ව්‍යාපාරිකයකු පෙරේදා (30 වැනිදා) රහස්‌ පොලිසිය මගින් අත්අඩංගුවට ගෙන ඇත. අත්අඩංගුවට ගත් ව්‍යාපාරිකයා දරුවා පැහැරගත් සිව්දෙනාගෙන් අයකුගෙන් තමාට ලැබීමට තිබෙන රුපියල් ලක්‍ෂ 20 ක මුදල ලබාගැනීම සඳහා මෙම පැහැර ගැනීම සැලසුම් කර තිබෙන බව විමර්ශනවලදී හෙළි වී තිබේ.

දරුවා පැහැර ගැනීමෙන් පසු රඳවා තැබූ නිවස කුලියට ගැනීම සඳහා මුදල් දීම හා සිම්කාඩ් ලබාගැනීමට සහාය දීම ව්‍යාපාරිකයා විසින් සිදුකර ඇති බව ද අනාවරණය වී ඇත.

මීගලෑව වීමෝල් හිමියකුගේ දරුවකු වූ දිනිඳු යශේන් දරුවා පැහැරගෙන රුපියල් කෝටියක කප්පමක්‌ ඉල්ලා එය ලක්‍ෂ තිස්‌පහ තෙක්‌ අඩුකර ගෙන ලැබෙන මුදලින් ලක්‍ෂ 20 ක්‌ වූ තමාගේ මුදල ගෙවන ලෙස ව්‍යාපාරිකයා දරුවා පැහැරගත් කල්ලියේ අයකුට පවසා ඇති බව ද හෙළිකරගෙන තිබේ.

කෘෂි උපදේශකයකු ලෙස ද කටයුතු කරන මෙම ව්‍යාපාරිකයාට පැහැරගත් දරුවාගේ වයසේ දරුවකු සිටින බවත් එම දරුවා භාවිත කළ කොට්‌ට, මෙට්‌ට සහ ඇඳුම් පැහැර ගැනීමට ලක්‌ වූ දරුවාගේ ප්‍රයෝජනය සඳහා ලබා දී තිබූ බව ද විමර්ශනවලදී හෙළි වී ඇත.